O martes 13 de decembro de 2005 tivo lugar unha conferencia titulada “Álvaro Cunqueiro e os seus amigos cataláns” impartida por Basilio Losada, convidado pola Fundación Carlos Casares, no Centro Cultural Municipal ‘Gonzalo Torrente Ballester’ de Ferrol. Este acto, que se sumou aos moitos eventos que durante o ano 2005 se desenvolveron por toda Galicia co gallo do cincuentenario da saída do prelo da obra Merlín e familia de Álvaro Cunqueiro, fixo parte do ciclo anual de actividades que a Fundación Carlos Casares organiza na cidade de Ferrol froito dos convenios de colaboración que se veñen asinando coa Área de Cultura do seu concello. O profesor Losada foi presentado por Ramón Loureiro, escritor e xornalista, e Pedro Xosé Blanco Llano, xerente da Fundación Carlos Casares.

O profesor Basilio Losada (Láncara, 1930), primeiro catedrático de Filoloxía Galego-Portuguesa da Universidade de Barcelona, é autor de numerosos estudos críticos sobre literatura galega, portuguesa e brasileira. Tradutor en sete linguas de obras de autores como José Saramago, Jorge Amado, Rosalía de Castro ou Pere Gimferrer, recibiu entre outros recoñecementos o Premio Nacional de Tradución de España, a Creu de Sant Jordi da Generalitat de Cataluña, a Comenda da Ordem do Infante Dom Henrique do Goberno de Portugal, a brasileira Ordem do Cruzeiro do Sul e a Medalla Castelao da Xunta de Galicia. Xubilado da cátedra dende o ano 2002, continúa a impartir clases na Universidade de Barcelona e noutras, sobre todo de Alemaña e os Estados Unidos de América.

Residente en Barcelona dende 1939, Basilio Losada é testemuña de excepción da cordial e intensa relación de Álvaro Cunqueiro co ambiente intelectual catalán durante os anos cincuenta e sesenta do século pasado.

Ramón Loureiro, Basilio Losada, Pedro Blanco